Зөлфәт. Гашыйк булсаң…

— Сыңар кашыгы да юк, — диделәр.
Ябыштым да чыктым мин, энем,
Йорты-җире бөтен булса әгәр,
Бәлки, аны сөймәс тә идем.
Мәхәббәт ул акча санын белми.
Тиенгә тормый анда алтыннар.
Ир «анасын сатса» елап яши
Бер кашыкка гашыйк хатыннар.
Мәхәббәт ул зәңгәр диңгез түгел,
Мәхәббәт ул түгел ак болыт!
Кырыслыкны җиңә алсаң гына,
Назлылыкка кер син атылып.
Мәхәббәт ул камил китап булып
Шунда гына бары языла —
Егет назы күчсә, ир назына,
Кызлар назы — хатын назына.
Мәхәббәтнең назы үзенчә ул,
Безнең ирләр аңа хаклылар —
Назга булган бөек хокукларын
Окоплардан саклап кайттылар.
— Сыңар кашыгы да юк, — диделәр,
Төкердем мин дөнья малына,
Ябыштым да чыктым.
Гашыйк булсаң,
Кашык кына, әйе, табыла!

Комментарий язарга