Арчага викисәфәр оештырылачак

Бүген бу хакта Арча шәһәрендәге "Казан арты" тарих-этнография музеенда "Сәләт ВикиМәктәбе" җитәкчесе Тимерхан Шәйхетдинов белән очрашудан соң билгеле булды. 28 март көнне яшь википедчылар "Казан арты" тарих-этнография музее, әдәбият-сәнгать бүлеге, "Әлифба" музее, Арчадагы тарихи объектлар һәм Яңа Кырлайдагы Габдулла Тукай әдәби-мемориаль музей комплексы белән танышачак.
Сәяхәт нәтиҗәсендә тупланган мәгълүмат һәм фотолар белән Татар Википедиясенә махсус мәкаләләр язылачак. Моңа кадәр викисәфәр Биләр һәм Иске Казан музей-тыюлыкларына оештырылган иде.