«Юллар» җыры

«Халык җырлары безнең киләчәктә мәйданга киләчәк әдәбиятымызга, бер дә шөбһәсез, нигез булачактыр».

Габдулла Тукай

Бизмәгәндәй яшәү бәхетеннән,
Юл йөрүдән мәңге бизмәм мин;
Юллар, юллар, инде ничә еллар
Аерыла алмыйм сездән мин.

Алларымда якты йолдыз төсле
Мавыктыргыч утлар яналар;
Юллар, юллар, борма-борма юллар
Шул утларга таба баралар.

Яшьлек хисен, тынгысызлык дәртен
Вакыт яңгырлары юмасын.
Юллар, юллар, авыр булса булсын,
Тик соңгысы гына булмасын.

Тибрәндереп якты уйларымны,
Җәйрәп ята данлы, киң илем;
Юллар, юллар, алга таба дәшә,
Бармый калыр хәлем юк минем.

 Ләбиб Айтугановның җырлары турында.

Л.Айтуганов сүзләренә язылган җырлар: «Һаман истә» (И.Шакиров көе, бу җыр Ф.Кудашева, И.Шакиров, М.Сөнгатуллин репертуарында бар); «Ышанам» (Р.Яхин көе, бу җыр З.Сөнгатуллина репертуарында бар); «Балыкчы җыры» (И.Хисамов көе); «Кыр казлары» (А.Монасыйпов көе); «Сандугач җыр суза» (А.Монасыйпов көе); «Әй, Кабаным!» (Ф.Әхмәтов көе); «Язлар җитсә» (И.Шәмсетдинов көе).

Л.Айтуганов үзе көйләрен язган җырлар: «Безнең күңелләр» (Р.Гарипов шигыре, И.Шакиров, Ф.Сәлахов, Ә.Авзалова, В.Гыйззәтуллина  репертуарында бар); «Төнбоек» (И.Юзеев шигыре); «Юллар» (Ә.Ерикәй шигыре); «Карлыганым, бөрлегәнем» (И.Юзеев шигыре); «Белсәң иде» (С.Хәким шигыре); «Башыңдагы шәльяулыгың» (Х.Мәхмүтов шигыре).

«Юллар» җыры Илһам Шакиров, Айдар Галимов, Риф Сафиуллин, Филүс Гәрәев, Гали Хәмзин репертуарында бар.

Фото:

Композитор, шагыйрь, радиожурналист, Татарстанның Әгерҗе районындагы Нарат авылы тумасы Ләбиб Айтуганов (1935-1964)

Шагыйрь, бихисап җыр текстлары авторы, 1934 елдан СССР Язучылар берлеге әгъзасы, Башкортстанның Дуван районындагы Өлкенде авылы тумасы Әхмәт Ерикәй (1902-1967) оныгы белән

Сәхифәне Ләбиб Лерон әзерләде.

«Безнең мирас». – 2025. – №3. – Б.110.

Кызыклы һәм файдалы язмалар белән танышып бару өчен Вконтакте төркеменә кушылыгыз.