Язучы Закир Һадиның тууына 160 ел

Язучы, мәгърифәтче, педагог Закир Һадиулла улы Һади (Закир Һади) 1863 елның 15 мартында Башкортстанның Бәләбәй өязендәге (хәзерге Башкортстанның Шаран районы) Ярмәкәй исемле татар авылында туган.

Башлангыч белемне туган авылында әтисеннән алгач, ул укуын Тымытык мәдрәсәсендә, аннары Касыйм шәһәрендәге Кастров мәдрәсәсендә дәвам иттерә.

Закир Һади 1885 елда Түбән Новгород шәһәрендә бер байның тире эшкәртү эшләрендә хезмәт куя. Күпмедер вакыт узгач, ул, Касыйм шәһәрендә яңачарак укыта башлаган мәдрәсә ачылуын ишетеп, шунда китә. Аннары Закир Һади, Касыйм шәһәреннән биш-алты чакрымдагы Татар Бае авылында җәдитчә укытучы мөгаллимнәр курсы ачылгач, шунда бара, аны тәмамлап, Мулта авылында мөгаллим була.

Төп басма китаплары: «Бәхетле кыз» (Оренбург, 1904), «Официант» (Оренбург, 1904), «Бәхетсез кыз» (Оренбург, 1905), «Мәгъсүм» (Оренбург, 1906), «Хәер-дога» (Оренбург, 1906), «Яңа Әсхабе кяһәф» (Казан, 1908), «Җиһанша хәзрәт» (Казан, 1908), «Сайланма әсәрләр» (Казан, 1957).

Закир Һади 1933 (кайбер чыганакларда – 1932) елда Рязань өлкәсенең Касыйм районындагы Бимсала (Царицино) авылында вафат булды.