Туфан Миңнуллиннан театраль мәзәкләр

Картаю

Камал театрының сәхнә артында – артистлар ял итеп утыра торган җирдә Туфан Миңнуллин бер артистканың бит очыннан пәп итеп алган икән. Моны күреп торучы өлкән артист Һидаят Солтанов:

– Да-а, Туфан да картая, хатын-кызларны кеше алдында үбә башлады, – дип әйтеп куйган.

 

Җансөймәс

Бер артист Фирдәвес Әхтәмовага тозлы-борычлы анекдот сөйләгән. Фирдәвеснең андый мәзәкләрне тиз генә аңламый торган гадәте бар. Икенче көнне ул теге артистны очраткан да:

– Карале, җансөймәс, кичә син оятсыз анекдот сөйләгәнсең ич, – дигән.

 

Зар

Академия театрында мишәр сөйләмендә язылган «Йөрәк маем» спектакленә репетицияләр бара икән. Төп рольне башкаручы халык артисты, Чүпрәле районында туып-үскән Ринат Таҗетдинов:

– Башта, Казан телендә сөйлә, дип, мишәр телемнән биздерделәр, хәзер, мишәрчә сөйлә, дип интектерәләр, – дип зарланып утыра.

 

Сәхифәне Ләбиб Лерон әзерләде.

Безнең мирас. — 2021. — №8. — 113 б.

Фото: azatliq

Комментарий язарга