Татар дәүләт филармониясе 100 еллык ТАССР тарихында

1987-1997 еллар

1988 елның 20-21 декабрендә беренче тапкыр «Татар җыры» конкурсы уза. Аны гамәлгә куючылар – ВЛКСМның Татарстан өлкә комитеты, ТАССРның Мәдәният министрлыгы, Г.Тукай исемендәге Татар дәүләт филармониясе, «Песня и милосердие» театр студиясе.

Татарстан артистлары Башкортстанда. 1988 ел

1989 елда конкурс Бөтенсоюз конкурсы дип игълан ителә. Аның лауреатлары һәм дипломантлары – Венера Ганиева, Идрис Газиев, Гөлнәзирә Талипова, Нәзиф Арсланов, Салават Фәтхетдинов, Георгий Ибушев, Асаф Вәлиев, Зөһрә Шәрифуллина, «Сабантуй» һәм «Гүзәлем» ансамбле.

1993 елда конкурс «Халыкара конкурс» статусы ала. 1997 елда ул күренекле композитор Сара Садыйкованың тууына 90 ел тулуга багышлап уздырыла.

1988 елда Татарстан Республикасы җыр һәм бию ансамбле «Халыклар Дуслыгы» ордены белән бүләкләнә.

Ансамбль 1987 елда – Япониядә, 1988 елда – Йәмән Республикасында, 1989 елда – Германия Федератив Республикасында һәм Финляндиядә, 1991 елда Төркиядә гастрольдә була.

Сулдан уңга: Равил Шәрәфиев, (билгесез), Раушания Шәрәфиева, Хәйдәр Бигичев, Римма Ибраһимова, Рафаэль Сәхәбиев, Алмаз Имаев, Зөһрә Сәхәбиева, Ганс Сәйфуллин. Казан, Ирек мәйданы. 1983 ел

1991 елның 15 февралендә Җыр һәм бию ансамбле мөстәкыйль иҗат коллективы булып эшли башлый, филармония составыннан чыга.

1992 елның 9 ноябрендә Татар дәүләт филармониясенең сәнгать җитәкчесе итеп Россиянең һәм Татарстанның халык артисты Илһам Шакиров билгеләнә.

Филармония 1992 елда Татарстан Композиторлар берлеге башлангычы белән үткәрелгән Халыкара «Европа-Азия» фестивалендә актив катнаша. 1996 елдан фестиваль Казанда ике елга бер тапкыр үткәрелә башлый. Ул Мәскәү, Чаллы һәм башка шәһәрләрдә дә уза.

1993 елда Татар дәүләт филармониясе составында Татарстан Республикасы халык уен кораллары дәүләт оркестры эшли башлый. Оркестрның сәнгать җитәкчесе һәм баш дирижер – Россиянең халык артисты, Г.Тукай исемендәге Дәүләт премиясе лауреаты Анатолий Шутиков.

Оркестр белән төрле елларда дөнья һәм Россия күләмендә танылган башкаручылар; Татарстанның күренекле җырчылары Илһам Шакиров, Зилә Сөнгатуллина, Венера Ганиева, Юрий Борисенко, Галина Ластовка, Георгий Ибушев, Рөстәм Маликов, Резеда Галимова, Айдар Фәйзрахманов һ.б. чыгыш ясый.

1994 елда Музыкаль-әдәби лекторий бүлеге үзгәреш кичерә: ул «опера һәм камера музыкасы бүлеге» кимәлендә эшли башлы. Аның җитәкчесе Татарстанның халык артисты Владимир Варшавский була.

1997 елда Татар дәүләт филармониясе оешуга 60 ел тула. Юбилей уңаеннан, Илһам Шакиров башлангычы белән, филармония музее ачыла.

 

Журналга Зимфира Гыйльметдинова әзерләде.

Безнең мирас. — 2020. — №6. — 106-107 б. 

Комментарий язарга