Татар дәүләт филармониясе 100 еллык ТАССР тарихында

1977-1987 еллар

1970 нче еллар ахырында филармония үткәргән конкурслар, фестивальләр һәм башка мәдәни чараларның саны арта.

1973-1988 елларда Татар дәүләт филармониясенең директоры Марат Таҗетдинов була. Бу елларда әдәби-музыкаль лекторий бүлегенең эшчәнлеге активлаша, Татарстан симфоник оркестрының эшчәнлеге тотрыклылана, Җыр һәм бию ансамбле матди яктан ныгый.

1976 елда филармониянең сәнгать җитәкчесе итеп Илгиз Мәҗитов билгеләнә. Илгиз Габидулла улы республика дәрәҗәсендә узучы зур тамашаларның, чит төбәкләрдә оештырылган татар әдәбияты һәм мәдәнияты декадаларының, авторлык концертлары һәм әдәби-музыкаль кичәләрнең режиссеры буларак та таныла.

Уңнан сулга (беренче рәттә): Наҗия Теркулова, Илһам Шакиров, Фәридә Кудашева, Айрат Арсланов; (икенче рәттә): Гали Ильясов, Хәнәви Шәйдуллин, Зиннур Нурмөхәммәтов, Рафаэль Ильясов, Гөлшат Зәйнәшева, Гөлзада Сафиуллина, Зилә Сөнгатуллина, Лена Шагыйрьҗан, Рәйсә Билалова; (өченче рәттә): Рафаэль Сәхәбиев, Мирсәет Сөнгатуллин, Эмиль Җәләлетдинов, Миңгол Галиев. 1980 нче еллар

1977 елда, Марат Таҗетдинов чакыруы буенча, Казанда Владимир Высоцкий, 1986 елда Булат Окуджава чыгыш ясый. Алла Пугачева, Валерий Леонтьев, Иосиф Кобзон, Лев Лещенко, Святослав Рихтер, Лолита Торресның Казанга беренче гастрольләре шулай ук ул директор булган елларда оештырыла.

1977 елда, балалар өчен симфоник концертлар булдыру ниятеннән, Татар дәүләт симфоник оркестры «Әкиятләр дөньясында» дип аталган абонемент циклын башлый.

1978 елда Җыр һәм бию ансамбле «Сабантуй» программасын чыгара. Программаның сценарий авторы һәм режиссеры Илгиз Мәҗитов була.

1982 елдан Композиторлар берлеге Татар дәүләт филармониясе белән бергә Идел һәм Урал буе автономияле республикалары композиторларының музыка фестивальләрен үткәрә башлый. Төрле төбәкләрдә узучы бу фестивальләр Россиянең күп композиторлары өчен генә түгел, Татар дәүләт филармониясе иҗат коллективлары өчен дә җитди имтихан була.

Композиторлар берлегенең ел саен үтүче концертлары, пленум һәм съездлары филармония ярдәме белән уздырыла. Әлеге иҗади бердәмлек нәтиҗәсендә филармония татар композиторларының академик юнәлештәге музыкасын пропагандалый: Нәҗип Җиһанов, Фасил Әхмәтов, Анатолий Луппов симфонияләре, Рафаэль Билалов һәм Ринат Еникеев концертлары, Мирсәет Яруллин, Бату Мөлеков һәм Борис Трубин ораторияләре, Рөстәм Яхин һәм Резидә Ахиярова романслары Татар дәүләт филармониясенең актив роле нәтиҗәсендә башкарыла.

1985 елда скрипкачыларның VII Бөтенроссия конкурсы үтә. Анда талантлы музыкантлар Рөстәм Абязов, Юлия Виват, Айгөл Рәхимова һәм Лия Ходжаевалар чыгыш ясап, югары профессиональ мөмкинлекләрен күрсәтәләр.

 

Журналга Зимфира Гыйльметдинова әзерләде. 

Безнең мирас. — 2020. — №5. — 110-111 б. 

Комментарий язарга