Пәйгамбәребез Мөхәммәднең (с.г.в.) хәдисләре

Габдулла бине Гомәр разыйаллаһу ганһү риваять итә. Рәсүлуллаһ салләллаһу галәйһи вәссәлам әйткән: «Ислам дине биш нигезгә корылган: «Ләә иләәһә илләллааһу Мүхәммәдүр рәсүлуллаһ» («Аллаһтан башка иләһ юк һәм Мөхәммәд салләллаһу галәйһи вәссәлам Аллаһның бәндәсе һәм рәсүле»), – дип шәһадәт бирү; намаз уку; зәкят бирү; рамазан аенда ураза тоту; хаҗ кылу».

Габдулла бине Гомәр разыйаллаһу ганһү риваять итә. Рәсүлуллаһ салләллаһу галәйһи вәссәлам әйткән: «Чын мөселман — аның теленнән һәм кулыннан башка мөселманнар сәламәт булган кеше; мөһаҗир — Аллаһ тыйган нәрсәләрдән күчкән (киткән) кеше».

Әнәс разыйаллаһу ганһү риваять итә. Рәсүлуллаһ салләллаһу галәйһи вәссәлам әйткән: «Сезнең һичберегез камил мөэмин булмас, мин аңа атасыннан, баласыннан һәм барча кешеләрдән сөеклерәк булганчы».

Габбас бине Габделмотталиб разыйаллаһу ганһү риваять итә. Рәсүлуллаһ салләллаһу галәйһи вәссәлам әйткән: «Кем Раббы буларак — Аллаһтан, дин буларак — исламнан, рәсүл буларак — Мөхәммәдтән (салләллаһу галәйһи вәссәлам) разый булса, ул кеше иман ләззәтен (тәмен) татыды».

Суфьян бине Габдулла Сәкафи разыйаллаһу ганһү әйткән: «Бервакыт мин: «Әй, Аллаһның илчесе, миңа ислам турында синнән соң башка беркемнән дә сорамаслык сүзләр әйт», — дип сорадым. Ул: «Аллаһка иман китердем дип әйт тә шәригатьтә тугры тор», — дип җавап бирде.

Гобадә бине Самит разыйаллаһу ганһү риваять итә. Рәсүлуллаһ салләллаһу галәйһи вәссәламнең болай дип әйткәнен ишеттем: «Кем: «Ләә иләәһә илләллааһу Мөхәммәдүр рәсүлуллаһ», – дип шәһадәт бирсә, Аллаһ аңа утны (утка табынуны) хәрам кылыр».

Хәдисләр Шәех әл-Камил Вәли әд-Динмөхәммәд бине Габделхатыйб әт-Тәбризинең «Мишкәтүль мәсабих» китабы буенча әзерләнгән һәм 1913 елда 3 китапта басылып чыккан.

Текстны басмага Айсылу Вәлиева әзерләде.

"Безнең мирас". - 2021. - №12. - 69 б. 

Фото: pixabay