Гамьле очрашу

Бүген Казан шәһәре Киров районының кыз балалар гына укый торган “4 нче гимназия-интернаты” нда укучылар белән очрашуда булдык. Анда редакциябез хезмәткәрләре Марат Закир, Ленар Гобәйдуллин һәм редакциябезнең дусты, танылган җырчы Алмаз Хәмзин катнашты. Очрашуда сүз "Безнең мирас" журналы, андагы материалларны белем һәм тәрбия бирү процессында куллану хакында барды.
Бу елның март аенда әлеге гимназиядә “Милли үзаңлы шәхес үстерүдә ХХ гасыр башы мөгаллимәләренең укыту һәм тәрбия өлкәсендәге мирасын куллану” дигән темага багышланган семинарда да катнашкан идек. Анда Фатиха Аитова мәктәбендә укытылган әхлак, кул эшләре, тыйб дәресләренең тарихи торгызылган вариантлары күрсәтелде.