"Мин гади җир егетемен, Ә син фәрештә төсле"

Бишенче кат – җиде кат күк,
Дүртенче кат – җир өсте.
Мин гади җир егетемен,
Ә син фәрештә төсле.
Бишенче кат – минем сөю,
Дүртенче кат – терәгем.
Синең күңелең янында
Минем очкын-йөрәгем.
Бишенче кат – синең сарай,
Дүртенче кат – минем өй.
Ике катның уртасында
Без чыгарган моңлы көй.
Бишенче кат – минем хыял,
Дүртенче кат – чынбарлык.
Ике ялкын, ике дулкын,
Зур дәрьяны чыгарлык.
Ленар Шәех
Фото: pixabay