Кадыйр Сибгат. Балдыз йоклый

Ята йоклап, онытылып:
эштән арып кайткандыр.
Елмаеп куя: төшендә
Мине күреп ятадыр.
Апай! диеп, Җизнәй! диеп,
Төшендә дә интегә.
...Тартып куегыз пәрдәне -
кояш төшә битенә.
Хатын исән, балдыз исән -
Куана минем ише.
Барыбер бәхетлерәк ул
балдызлы булган кеше.
Хатының мырлаган чакта
Балдызың гаделрәк.
Балдыз ул синең таяныч,
балдыз ул кадерлерәк!
Тыныч кына йокла, балдыз,
авыр уйлар уйлама.
Мине төшләреңдә күреп,
йокла, балдыз, уянма.
Көндез йокыларың тәмле.
Төнлә йокы кала ул.
Йокла, балдыз, хафаланма -
җизнәң тора каравыл.