Атна уртасында көннәр җылытачак

Татарстанда атна уртасында көннәр җылытачак. Бу хакта Татарстан Гидрометеорология һәм әйләнә-тирә мохитне күзәтү идарәсенең матбугат хезмәте хәбәр итә.

Чәршәмбе көнне, ягъни 8 апрельдә, республикада урыны белән бераз явым-төшем булуы ихтимал, төнлә – кар, көндез яңгыр явачак. Моннан тыш, төбәкнең көнчыгышында төнлә төньяк-көнбатыштан көчле җил исәчәк. Төнлә 0..-5, көндез 3-8 градус җылы, Татарстанның көнбатышында термометрның терекөмеш баганасы +12 градуска кадәр җитәчәк.

Казанда Әмирхан Еники истәлегенә мемориаль такта ачыла

2020 елның 14 февралендә 11:00 сәгатьтә Татарстанның халык язучысы Әмирхан Еники истәлегенә мемориаль такта ачу тантанасы узачак. Бу хакта Татарстан Язучылар берлеге матбугат хезмәте хәбәр итә.

Истәлек тактасы язучы озак еллар яшәгән йорт диварына – Казан шәһәре, Чехов урамы 53 йорт адресы буенча урнаштырылган.

Казанда «Милли киемле ханым» хатын-кызлар конференциясе узачак

12 февральдә Казанның ТР мөселманнары Диния нәзарәте резиденциясендә «Милли киемле ханым» дип исемләнгән хатын-кызлар конференциясе узачак. Чара Татарстанда игълан ителгән Туган тел елы һәм ТАССР оешуның 100 еллыгына багышлана. Бу хакта нәзарәтнең матбугат хезмәте хәбәр итә.

Татарстанга салкын килә

Татарстанга атна уртасында салкыннар киләчәк.

Чәршәмбе көнне, 5 февральдә,  синоптиклар фаразлавынча, салкын һава торышы көтелә: төнне -4тән -9 градуска кадәр, көндез -1дән -6 градуска кадәр салкын булачак. Бераз кар явачак, урыны белән буран булуы да ихтимал. Юлларда көчле бозлавык саклана, сак булыгыз.

Казанда Сара Садыйкова истәлегенә мемориаль такта куячаклар

Казанда Кәрим Тинчурин урамындагы 7а йорт фасадында татар композиторы Сара Садыйковага мемориаль такта урнаштырырга планлаштыралар. Тиешле боерыкны Татарстан премьер-министры Алексей Песошин имзалады.

Луиза Янсуар: Киләчәктә Шәриф Камалның гаилә хроникаларын ясарга җыенабыз

Татар китабы йорты директоры Луиза Янсуар киләчәктә татар язучысы Шәриф Камалның гаилә хроникасын ясарга теләве хакында әйтте. Бу хакта ул «Татар-информ» хәбәрчесенә музейның җитмеш еллыгына багышланган кичәдә сөйләде.

Нәкый Исәнбәткә багышланган кичә көтелә

Габдулла Тукай әдәби музее  Г.Тукай исемендәге Дәүләт бүләге лауреаты, халык язучысы Нәкый Исәнбәтнең тууына 120 ел тулуга багышланган «Мин Тукайның замандашы» дип аталган фәнни-әдәби кичә оештыра.  Кичәгә милләттәшләребез, студентлар, укытучылар һәм зыялылар чакырыла. Чараның программасы белән безне музей директоры Гүзәл Төхвәтова таныштырды. 

Газинур Морат нигә акчадан баш тарткан?


 Татарстанның Г. Тукай исемендәге Дәүләт премиясе лауреаты Газинур Морат ТАССРның 100 еллыгына багышланган әсәрләр конкурсында ни өчен катнашырга баш тартуын аңлатты. Бу хактагы борчылуларын «Татар-информ» белән бүлеште.

«Мин башта кызыккан идем. Очлап та чыга идем инде. Ләкин иртән торгач та, кич ятканда да шул хакта гына уйлап йөри башладым. Каушап калдым, йокым качты. Мин болай да ике аягым белән казна эшенә береккән бит, ике кулымны да бәйләп куясым килмәде. «Ач тамагым, тыныч колагым» дидем дә, баш тарттым», — дип аңлатты ул.

ТАССРның 100 еллыгына багышланган әсәрләр конкурсында катнашып алты язучы — 500 мең сумлык, 20 язучы 100 мең сумлык, 20 язучы 50 мең сумлык грант отты. ТР Мәдәният министрлыгы сайтына урнаштырылган мәгълүматларга караганда, 100 мең сумлык грант алучылар исемлегендә булса да, Газинур Морат гариза язып конкурста катнашудан баш тарткан.

«Өйдә генә утырып эшли торган профессиональ шагыйрьләр өчен бик кирәк ул грант. Уйладым-уйладым да, баш тартырга булдым. Сәбәбе шул гына. Тәвәккәллегем җитмәде. Алла бирсә, алга таба булыр әле», — диде Татарстан китап нәшриятында мөхәррир булып эшләүче шагыйрь Газинур Морат.

  • Грантлар конкурсында катнашучылар әсәрләрен май аенда тапшырырга тиешләр.
  • Конкурс буенча иҗатчыларга барлыгы унбиш млн. сум грант бирелә. Барлыгы унике номинациядә грантлар тапшырыла. Бу турыда «Интертат» тулырак итеп язып чыкты.
Татар-информ