Яратам бугай…

Аның турында уйланып мин
Йокысыз үткәрдем төнне бүген;
Янып чыктым.
Әгәр дә шушы минутта
Ул авырып ятса, янса утта?
Әгәр дә ул каты сызланса?
Маңгаен тотарга да кеше булмаса
шушы минутта?!

«Очрашасы, тизрәк очрашасы иде!»

Очрашасы иде…
Арабызда яткан ераклыклар
томанына
Үч итеп, бер очрашасы иде,
Югалган дип уйланган,
Юлы бүленеп торган
Шатлыклар чыгында
Керфекләрне чылатасы иде! —
Очрашасы иде!