Совет чорындагы укыту һәм тәрбия системасын камил булган дип саныйм – Әнвәр Хуҗиәхмәтов

“Патриотик хисне басым ясап, Президент Указлары нигезендә генә тәрбияләп булмый”, — дип белдерде Россия һәм Татарстанның атказанган укытучысы, педагогик фәннәр докторы, профессор Әнвәр Хуҗиәхмәтов “Татарстан-Яңа гасыр” телеканалында бара торган “Ком сәгате” тапшыруында.

“Совет чорындагы укыту һәм тәрбия системасын мин аеруча камил, файдалы һәм үтемле булган дип саныйм. Чөнки ул чорда бу эшчәнлек көчле идеологиягә корылган иде. Ә бүген исә ул гомумән дә югалды. Хәзер идеология – ул ясалма төшечә. Бу исә безнең яшьләребезгә төпле белем бирүгә бик тә комачау итә”, — дип саный профессор.

“Яшьләребезгә патриотик тәрбия бирү, илебезнең киләчәген кайгырту турында күп сөйләнә анысы. Тик бу өлкәдә никадәр генә күп көч куелмасын, тулы бер концептуаль чолгап алу, бу мәсьәләгә комплекслы якын килү һаман да юк. Аннары патриотик хисне басым ясап, Президент Указлары нигезендә генә булдырып булмый. Бу эшчәнлек бала тугач ук башланырга тиеш”, — ди атказанган мөгаллим.

Әнвәр Хуҗиәхмәтов фикеренчә, тәрбия һәм белем бирү кебек төшенчәләрне аерып карау шулай ук дөрес түгел. Бу – бердәм процесс булырга тиеш.

http://tatar-inform.tatar/news/2017/05/28/141479/

 

Роберт Миңнуллин: Татарстанга яңа Шартнамә, һичшиксез, кирәк

“Шартанмәләрнең икесен дә төзү һәм язуда катнашкан кеше буларак шуны әйтәм: әлеге документ безгә кирәк», — дип белдерде Татарстанның халык шагыйре Роберт Миңнуллин.Бу хакта ул  “Татарстан-Яңа гасыр” телеканалында бара торган “Ком сәгате” тапшыруында белдерде.

«Әгәр дә без Татарстан икән, икенче урында торган зур санлы милләт икән, соңгы 25 ел эчендә үз республикабызны, дәүләтчелегебезне тота алган зур халык икән (биредә мин барча татарстанлыларны күздә тотам), Шартанмә, һичшиксез, булырга тиеш. Бу бит безгә генә түгел, Мәскәү хакимияте өчен дә кирәк. Әгәр дә безнең республика иң алдынгы рәтләрдә бара икән, аның Президенты дөнья күләмендә, Ислам дөньясы илләрендә турыдан-туры эш алып бара икән, аңарга Россия Президенты исеменнән билгеле бер вәкаләтләр бирелергә тиеш. Вәкаләтсез безне чит илдә аңламаячаклар”, — дип саный шагыйрь, публицист, дәүләт һәм җәмәгать эшлеклесе Роберт Миңнуллин.

“Әлеге документта ниндидер зур вәкаләтләр язылу да кирәк түгел, хәтта, аның формаль рәвештә булуы да җитә. Шартанмә сүзе булу, ике Президентның кулы куелган кәгазь булу мөһим. Әгәр дә өченче шартнамә төзелмәсә, бу – рухи яктан зур җиңелү булачак. Безне яратмаган башка өлкәләр, хакимияттә утырган кайбер затлар рәхәтләнеп бәйрәм итәчәк. Ә иң мөһиме, без бу Шартнамәне кире кайтарып ала алмаячакбыз”, — дип белдерде ул.

“Татар-Информ”