Татарстан халыклары Дуслык йортында чәй культурасы турында сөйләштеләр

Татарстан халыклары Дуслык йортында “Самавыр: төрекләрдә, татарларда һәм русларда чәй культурасы” дип аталган осталык классы узды. Чара Төркиянең Казандагы Баш Консуллыгы Юныс Әмрә Институты ярдәме белән оештырылды.

Осталык классын үткәрү инициативасы Төркиянең Казандагы Генераль консулы Турхан Дилмачның тормыш иптәше Анна Дилмачныкы икәнен билгеләп үттеләр.

Чарада Мәрмәрә университеты профессоры, доктор Кәмаләттин Кузуҗу һәм Казан Федераль (Идел буе) университеты доценты Руслан Бишков чәй культурасы һәм тарихы турында чыгыш ясадылар. Төрекләр татарлар кебек чәйгә сөт салып эчәләрме дигән сорауга, Кәмаләттин Кузуҗу “Бездә андый гадәт юк”, – диде.

Руслан Бишков үзенең чыгышында: “Чәй – ул дуслык һәм мәхәббәт эчемлеге”, – дип белдерде.

Осталык классы барышында кунакларга төрек чынаякларында төрек чәе, аннан соң гади чынаякларда татар чәе тәкъдим ителде. Шулай ук төрек тәм-томнарыннан да авыз иттеләр.

Чыгыш ясаучылар арасында чәк-чәк музее вәкилләре дә бар иде. Алар татар тәм-томнары, аерым алганда чәк-чәк һәм бавырсак турында сөйләделәр.

Шулай ук кунаклар арасында Дәүләт Думасы һәм Татарстан Республикасы Дәүләт Советы депутатлары бар иде.

“Татар-информ”

 

Марат Бәшәров: Мин үземне белгәннән бирле иманлы

Театр һәм кино актеры Марат Бәшәров дингә мөнәсәбәтен белдереп, үзен белгәннән бирле иманлы булып яшәве турында әйтте. Бу хакта ул Мәскәүнең Җәмигъ мәчетендә уздырылган “Югалган васыять” спектакленә багышланган матбугат конференциясендә белдерде. Актерның сүзләре Россия мөфтиләр шурасы рәсми сайтында китерелгән.

“Миннән күптән түгел кайчаннан бирле иманлы булуымны сорадылар. Мин исемә дә төшерә алмыйм. Үземне белгәннән бирле мин иманлы. Әти мине кечкенәдән мәчеткә алып йөрде. Беренче тапкыр мин өч яшемдә анда булдым”, — ди Марат Бәшәров.

Актер Ислам диненә ышаныч тудырган могҗизалы очраклар белән дә очрашуын санап үткән. “Хәтерлим, мәктәптә укыганда өй эше эшләмичә килгән идем, күчерергә дә өлгермәдем һәм миннән сорамасыннар дип парта артында Алладан сорап утырдым. Миннән сорамадылар. Университетта укыганда егерме билетның икесен генә өйрәндем. Аллаһ минем догаларыма җавап кайтарды, мин өйрәнгән билет чыкты. Бу мисаллар укымаска дигән сүз түгел, Иман мине ышанырга илһамландыра. Аллаһтан сора – һәм синдә барысы да булачак. Чын күңелдән ышанырга һәм сорарга кирәк”, – дип сөйләде ул.

«Мөселман булу белән горурланырга кирәк”, – дип саный актер. Ул ислам динендәге актерларга иман турында онытмауларын һәм моннан оялмауларын теләде.

Марат Бәшәров театр һәм кино актеры, Татарстанның атказанган артисты, Россия дәүләт премиясы лауреаты. Узган ел ул “Җан белән сөйләшү” дини театральләшкән тамашада катнашкан иде, бу елны “Югалган васыять” спектаклендә катнашуы көтелә.

Хәбәр иткәнебезчә, 29 гыйнварда Мәскәүнең Crocus City Hall бинасында, мөселманнарда Мәүлид аен бәйрәм итү кысаларында, “Югалган васыять” дип исемләнгән театральләштерелгән музыкаль тамаша куела. Спектакльдә танылган театр һәм кино актерлары Марат Бәшәров, Шамил Хаматов һәм Бибигөл Актан катнашачак. “Югалган васыять” тормыш авырлыкларына түзә алмыйча, үзенә кул салырга карар кылган кыз һәм аңа ярдәм иткән кешеләр хакында.

“Татар-Информ”