Рәдиф Гаташ. Күңелемдә ике яз

Бу көннәрне якты дию генә,
Алтын дию генә аз мәллә?!
Нәрсә булды көзгә? Нәрсә булды безгә?
Тирә-юньдә яшел яз мәллә?

Бу күңелдә нинди шатлык хисе,
Каян килә җылы май нуры?!
Нәрсә булды безгә? Нәрсә булды көзгә?
Җанга ява ләйсән яңгыры…

Бу гөлләр, күр, соңгы гөлләрмени?
Күпме матур төсләр, күпме наз!
Нәрсә булды безгә? Нәрсә булды көзгә?
Килде җиргә быел ике яз!

Комментарий язарга